Бас прокуратура 2012 жылы «Арқанкерген» шекара бекетінде 15 адамды өлтірді деген айыппен сотталған Владислав Челахтың өтінішін зерттейтінін мәлімдеді.

– Арыз Бас прокуратураға келіп түсті. Біз қосымша зерттейміз, өйткені бұл он жыл бұрынғы мәселе. Қажет болған жағдайда жауап алынады, – деді Бас Прокурордың бірінші орынбасары Тимур Тәшімбаев.

Айта кетейік, Владислав Челах Қазақстан президенті Қасым-Жомарт Тоқаевқа хат жазып, болған жағдай туралы куәлік беруге дайын екенін мәлімдеді.

Еске салайық, 2012 жылдың мамыр айында Алматы облысындағы «Арқанкерген» шекара бекетінде 14 шекарашы мен бір қорықшының мәйіті табылды. Бірнеше күннен кейін қанды қырғынды мойындаған «Арқанкерген» шекарашысы Владислав Челах анықталды. Тергеу мәліметінше, Челах алдымен сарбаздарды атып, кейін казарманы өртеп жіберген.